Zirna leh Rawngbawlna kan tih hian kawng tam takin sawi tur a awm thei ang. Zirna chu kawng tinreng a hmasawnna ( All round Development )kan ti a. Hei hian degree mai bakah mihring thiamna leh finna a keng tel a ni. Rawngbawlna kan tih chuan hmangaihna leh tlawmna nen a midangtan a inpek te, rawngbawl tur a chhandam kan nihna te a kawk thei ang. Zirna leh Rawngbawlna hi a hrang ve ve a sawi dawn chuan mihring nunah hian pawimawhna lian tak a nei ve ve a ni.
Thiamna leh finna a sang zel a intlansiakna khawvelah kan tlan suau suau a, Kohhrana rawngbawlna kan ngaihpawimawh dan pawh a tla hniam ve zel , chutih rualin thiamna leh finna sang zelin thalaite khawvel lamah kan tlan suau suau hlawm a, Kohhranin theih tawpin thalai te hnuh hnaih tum in ṭan an lo la ve bawk. Eng hi nge siamthat ngai a eng hian in nge min ti buai.? Kan zir dan thlak danglam nge Inkhawm tih tlem ṭul tih te hi tunlai kan vei lian tak a ni.
Zirna leh rawngbawlna hi insu buai miah lo in an kawng ve ve ah an kal a, a buai ber leh buaina lian ber chu keimahni zirlaite leh rawngbawltute hi kan ni. Zirna leh Rawngbawlna hi kal kawp tlat tur a ni. A khawi emaw zawk zawk hi ngaihpawimawh bik tur a awm lo a ni. An pahnih inkarah hian mimal zalenna leh duhthlanna a pawimawh hle. Kohhran hnuaiah sikul tam tak din a lo ni tawh a, heng atangte pawh hian zirna leh rawngbawlna a kal kawp tlat a ni tih a chiang hle. Ringlo mite karah pawh sikul dinin zirna hi rawngbawlna peng pawimawh tak a ni tih a lang. Zirna hi ‘All round development’ kan ti a. Kawng tinreng a hmasawnna bakah hian ‘Moral Education and Ethics’ hi kan inzirtir pawh a ngai tam hle.
Zirna leh rawngbawlnaah hian tum thelh zawngin a kal ve ve theih tlat. Zirna leh rawngbawlna hian ‘Nun’ a entir a, nun tam kan lo neih theihna tur a zir leh Pathian rawngbawl kan lo ni zawk. Mahni kan in enlet a ngai fo,zirna leh rawngbawlna hi kan nunah a beh tlat tawh avangin kal kawp tir thiam a ngai a ni. Kohhran bel lo zirlai a titha chu hruaitu tha a nih theih loh a,UPSC(CSE) a Mizo kan tlin theih loh chhan a K.T.P. rawngbawlna puh te hi a dik lo, mahni insiam rem si lova inkhawm tam leh K.T.P. thil tih tam lutuk a puh ringawt tur pawh a ni in ka hre lo. Sawi zau tur a tam hle ang. Kan infuih thin dan te kan rilru suk thlek dik lo te leh kohhran leh khawtlang a nihna eng emaw avanga kan in en hniam leh san thin dan te hi thlak a hun viau tawh a ni. Zirna kawng a hlawhtlinna kan teh thin dan pawh hi thlak a ngai ta hle. Tin, Nun hi thlir thiam a ngaih bakah hun hman thiam a hman that a ngai hle.
Zirlai kan nih chuan thil tihna engkim a tel tum erawh chuan a tha ber lo, Kohhran hian zirlai ti buai khawp a inhmang turin min phut lo tih hi kan hriat a tha. Chhawrtlak leh dingchhuak tlak ni tur chuan Kohhran bel ila, zirlai piah lamah lehkhabu tha chhiar fo ila chu chuan finna leh thiamna,hmasawnna kawng engkimah min pe zawk ang.
Kan infuih tha viau tawh in ka hria. Saptawng han hawh leh ila ‘ Action is more louder than words’ tih leh ‘Motivation Vrs Discipline’. He thu pahnih hi hlawhtlinna kawngah hian a pawimawh hle. Words (thu) hi Motivation (infuihna) a ni a, Action ( thiltih) hi Discipline( inthununna) a ni. A tih(Action) awm si lova thu(Words) a sawi ringawt chuan hlawhtlinna a thlen lova mahni inthununna(discipline) tel lova infuih phurna(Motivation) ringawt hian min hlawhtlin tir thei lo bawk. Mihring chu nung ho tur a siam kan ni a chu vang chuan Kohhran leh Khawtlang a kan tel ve na hian mipangngai ah min siam ve bawk. Mi min hmun dan turah nge Pathian min hmuh dan turah kan buai zawk thin le.? Zirlai kan nih chuan thil zawng zawngah kan tel vek thei lo a ni tih hi pawm phawt tur, Kohhran hi thawhhona a ni a, a ṭhen chu midang tihah te pawh dah thiam a ngai fo. Kan theihna leh phak tawk a in ang lova kan theihna kawngah erawh chuan theih tawp chhuah ve a tha hle.
Mahni inthuhnun theihna, hun hman thiamna te hi a pawimawh em em bawk. Lehkha zir kan ngaihna te, rawngbawlna lam a tel ve kan ngaihna te chhut lawkin hun fel fai tak leh hlawk thlak zawkin a hman theih a ni tih hi inhnial buai ngai lova pawm viau tur. A ṭul hunah chuan kan zir ang a, a ṭul hunah chuan kan inkhawmin kohhran leh a rawngbawlna ah pawh kan tel ve ang. Zirna leh rawngbawlna hi inbuk tawk thiam takin a kal kawp pui thei reng a ni. Mi taima lehkha thiam leh mi inchhiar zau chuan khawvel awm dan an hmu thiam a, mi hriatthiamna an ngahin nun thlir dan te pawh an thiam hle, rawngbawlna leh midangte nen nun hona ah pawh entawntlak tak an lo ni bawk thin. Mi nachang hria, mi remchang hria, a hun leh hmun a zir a insiam rem thiam leh pa rawn tlak, nu rawn tlak an ni fo bawk.
Sap Missionary te Mizoramah an rawn lut a zirna in te hawngin hmasawnna pawh nitinin kan hmu zel a, kan tun hun thlengin hmasawnna chu a zuan in a zuang tawh a, ‘ Zirna leh Rawngbawlna’ a pawimawh kawp zia leh a kal kawp thei a ni tih kan in hrilh hial a lo tul ta . Thiamna te a lo sang zel a Kohhran te chu thalai te ah dah pawimawh hmasak lohna a tam tial tial in mahni a thil ti ve thei tawk ah kan in ngai fo. Zirna chuan zir tur chin min pe a, nun erawh zirlai har tak zir tawp ni awm thei si lo a ni. Zirna ringawt chuan khawvel finna leh remhriatna tak tak min pe lova ,Krista nen a rawngbawl hna kan phak ang tawk a kan thawh ve na chuan a rawn ti famkim ta thin a ni.
Comments