THE MYTH OF SISYPHUS
Greek hmakhawsang thawnthuah khan Olympus tlang a awm a,chu hmun chu pathian te chenna, thlipui leh ruahpui, lirnghingte pawhin a tih buai ngai lohna hmun a ni. Zeus chu pathiante zing a ropui ber a ni a,pathian zinga chi hnuaihnung ber nature pathian Metope-i fanu Aegina-i a ngaizawng a,Zeus chu mupuiah changin Aegina-i chu a thlawh bo pui ta daih a.Corinth khawpui an va thlen chuan an lal Sisyphus-a chuan a lo hmu a, Aegina-i pa hnenah a hrilh a chu thu chu Zeus an a hriat chuan a thinrim hle a. Greek pathiante leh mihring inkar a palai hna thawk mihring te thlarau la tu Thanatos chu Sisyphus-a thlarau la turin Zeus chuan a tir a mahse Sisyphus chuan Thanatos chu lo man in a thlung bet ta daih a. Thanatos chu Sisyphus an a chhuah hma chu mihring te chu an thi thei tawh lova, an sual hremna an pumpelh ta vek a. Chu thu chu Zeus an a hriat leh chuan Sisyphus chu mitthi khuaah kumkhuaa tlang pang awiha lung lum turin a hrem ta a,tlang chhip a thlen dawn apiangin lung rihna chuan a lum thlak pui leh thin a, chuti ang chuan nitinin engtikah nge tlang a thlen pui ang tih pawh hre lo chuan lung chu a nam chho leh ngat ngat thin a ni.
He thawnthu atang hian Albert Camus chuan Sisyphus chu Absurb hero tiin nun awmzia min thlir pui a ni. Tawngkam kan hriat lar tak " One must Imagine Sisyphus Happy " hian Sisyphus a hlimna leh lungawina ang nun nei ve turin min duh a ni. Chatuan a lung nawr chu Sisyphus a tan awmzia nei lo mah se engmah tih danglam theih a nei chuang lo, a duh emaw duh lo emaw lung nawr chauh chu a tih theih a ni. Atan lung nawr chatuan ringawt chuan awmzia nei in hre lo mahse tih danglam leh thlak danglam theih engmah a nei lo tih a hre chiang, chu awmze nei lo atang chuan Albert Camus chuan nun hian awmzia a nei lo a ni tih pawm a,chu nun pawm thiamna chuan midanglamah min siamin min ti zalen ta zawk a ni tih hi Sisyphus nun atang min kawhhmuh tum a ni.
He philosophy hian mihring nihna leh mimal nun leh duhthlanna a ngai pawimawh em em a. Sisyphus khan chatuan a hah tak leh rim takin lungngaihna tam tak nen tlang chhip thlen chho theih hun suangtuahna nen phurrit phurh rit ti tak chungin tawp chin nei lo saltanna chuan kumkhuain a tan tir thei reng mahse chu hna chatuan a a phurh tawh tur chu hahdam tak a thawkin awmzia a neih tir ta a ni. Engtin nge chutiang chuan a tih theih tih kan zir chian chuan mihring nun hi lungngaihna leh hlimna, harsatna leh lawmna,manganna te a chhawkin a lo awm reng a, chu harsatna chu engtikahmah a bo dawn lo kan damchhungin kan tawng reng dawn ,chuvang chuan keimahniah duhthlanna zalen kan nei a kan hma a thil thleng kan lo dawnsawn danah kan khawvel chu a lo innghat ta zawk a ni.
SISYPHUS-A A HLIM A TI NGE I HLIM VE LOH ?
Hlimna kan zawnna hmun a dik miau hek lo. Hlimna te hi hna sang tak chelh hunahte, kan thil tum kan tih hlawhtlin hunah te,nupui/pasal tha tak kan neih ve hunah te, hna nghet kan neih ve hunah te ,nupui/pasal fanau chhungte tan pawisa tam tawk tak kan neih ve hunah te, khawtlang leh kohhran tan eng emaw ni tak ka nih ve hunah te kan ti a. Sisyphus-a kha chatuan a lung nawr tur a tih a ni a mahse kha a thil tihah khan lungawina a hmu bik tlat. Hlimna te hi kan thil neih leh nihna te ah a innghat lova kan tun hun a kan thil tih leh neih ah theih tawp kan chhuah ve a ni tih hriat a lungawi thiamna leh pawm thiamnaah hlimna chu a lo awm zawk a ni. Stoic philosopher Seneca pawh khan ti hian a lo sawi ve bawk "I thlen phak chinah lungawi tum rawh,pakhatna a nih vek theih loh ania" tiin. Kan Bible pawhin Phillipi 4:11 ah " Kei zawng eng ang pawhin awm mah ila,lungawi zel ka ching tawh si a" a lo ti bawk.
Sisyphus-a hlimna chhan dang leh chu thil nihna tak tak a hmachhawn a ni.A chanvo te chu tawrhnaah ngai lovin a chanvo a tih tur a ni tih hria in a pawm mai a ni. Nun dang neih leh kha a duhthusam ber lo, midang nen a intehkhin ngai lova mi hlimna a va awt lova ama nihna ang ang khan a in pawm a, chu nun pawm thiamna ( acceptance ) atang chuan tlamuanna a hmu a ni. Kan hlim lohna tam tak te hi thil tha kan beisei lutuk avangte chak leh duh kan ngah lutuk avang te kan nih lohna ang a lan kan tumna te avangin a ni fo.
Sisyphus kha tun hunah (present) ah a cheng. Nang i cheng ve em ? Mitam tak chu kan hun kal tawh(past) leh hun lo la awm tur(future) ah kan buaiin kan mangang a, hmasawn a har thin a ni. Kan past leh future ah kan buai a kan vawiin hunah pawh kan nung hman meuh lo. Sisyphus khan duhthlan tur dang a nei lo mahse a thil tih lai mek ah khan rilru a pe zawk a ni. Nakkin a a hlimna tur zawk ngaihtuahin a tun hun kha a khawhral miah lo,a tun hunah khan mahni innawr kal chungin hlimna tur a zawng mai a ni. Kan bible pawhin "Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni." a ti a ni.
The struggle itself towards the heights is enough to fill a man's heart. One must imagine Sisyphus happy.
Comments