Zing lam dar 3 a ni a ka hawi kual a, thawm hriat tur reng a awm lo, a reh thiap a a thim khup a boruak a vawt lutuk lova van lam ka han hawi chho a a reh hian a reh tlawk tlawk "LALPA" tiin zawi te hian aw ka chhuah a, mal tlawk tlawk hian ka inhria, ka lam atang tumah reng ka hmu lova malna leh khawharna chuan min rawn tuam a, ngaihtuahna zawng zawng a bo va, duhthusam tak ngial pawh ka nei tawh lo, ka hma lam ka thlir a beisei engmah ka nei tawh lo. Chu zan khawharthlak takah chuan, thihna chauhin min chhan chhuah theih ka ring a, tukverhah ka ke ka dah chhuak a, hlauh reng ka nei tawh lo ka thinlung chu ka mittui te chuan a far keh zo a thihna lam pan chuan ka zuang thla ta a.
Ka harh chhuak a nasa tak hian ka thin a phu a ka thaw tha thei lova, ka tha a khur a hetiang hian vawi tam ka awm fo tawh a mangchhia hian min um zui reng thin. Khua a la var chiah lova zing lam dar 4 vel a ni a ka thianpa Malsawma message ka va thawn a "Mumang tha lo ka mang leh tawh ka thaw tha thei lo, ka tha a khur a ka muhil thei tawh lo" ka va ti a. Khumah chuan ka thu a thawk te ka han la a, ka thin hi a na vawng vawng a zawi te hian 'LALPA' ka ti leh ringawt a. Khumah chuan ka mu reng a khua pawh a rawn var a ka thinphu rang a la reh thei lo, hla tak ngial pawh ka ngaithla thei lo, a reh mai thei lova khum atang chuan ka tho chhuak ta ringawt. Zing dar 7 vel a ni a Malsawma chuan min rawn reply a ngaihsak awka tak hian "Tunah eng nge i an engtin nge i la awm i tha em?Ti nge min rawn call loh, min rawn call ziah rawh ka tih che kha" a rawn ti a. A msg chu ka chhiar a ka reply lem chuang lo, a hnu lawkah Malsawma bawk chuan "Ka rawn call dawn em,call i duh em?" a rawn ti leh a ka la reply chuang lo. A rawn call ta ngei a mahse ka la lo msg ka va thawn a " Tunah chuan ka zia tawh e, phone call ka hmang peih rih lova" tih hi ka va thawn a. "Awle, harsatna a awm chuan min rawn call rawh min rawn call ngei ngei ang che" a ti a.
ka nu in min chhuahsan atang kum 4 chu a liam ve ta a, kan inah chuan ka pa ho in cheng mahila a tam zawkah hi chuan luahlumtu awm lo ang mai hian chhungkim lai pawhin a reh tlawk tlawk a, mahni tal tal in kan tal hi a ni ber mai. Tui tak a eirawngbawl a hlim tak a chaw kil ho ai chuan in haunain bul kan tan a, chaw ei dawhkan te chu inhauhna dawhkanah kan chan leh thin. Chaw kil pui tur ka nei ang e maw tih rilru pu tho si chuan eirawng ka bawl a phurawm lo thin khawp mai. Ka bawl zo tihah chuan ka pa leh ka u te chu ka kai tho a lo ei mai rawh an ti sam et a mahni bawk chuan tui lo fahran hian ka ei a, hna kal tur ka nih avang chuan ka ei sawk sawk a ka insiam a hnathawk tur chuan ka chhuak a. Pvt Company pakhatah Office Assistant hna ka thawk ve a in lam awm ka nin thin em avang chuan office pawh ka thleng hma thin hle. Ka hnathawh ka tui a nuam ka ti a pu te duhsakna pawh ka dawng hnem thin hle.Office hun chhung chu rei lo ka ti thin hle a,ka thianpa pakhat hian "vawiin tlai chu chaw lo ei la ka rawn hruai ang che"a ti a. Dik tak chuan engmah hi nuam ka ti lo thian kawm pawh nuam ka ti lova engmah hi ka ti peih lo.Thiante sawmna hnial thiam lo chi tih tak ah chuan kan thil tih tur hrereng chung chuan a sawmna chu ka lo pawm leh ta mai a.Kan hun hman thin dan erawh a ho thin viau mahse haw peih loh chang deuh hi chuan hahchawlhnan ka hmang ve fo thin. Tlai dar 5 velah chuan min lam turin a rawn kal a , ka hmuh rualin "Eirawng ka bawl peih miah lo a nia" ka ti nghal a. Amah bawk chuan "Siam vak a ngai lo vawksa kan chhum ang a tawk mai" a ti a. An in lam panin kan in phur thla a. In kan thleng a keiin eirawng ka bawl a chaw ei hma beer kan lem dun sek a ti ti pawh a kal chho tui tan hle. College kan kal lai atang inhre tawh kan ni a kan dinhmun a in ang a kan inhrethiam dun hle, eng lutuk hi chu kan in hriilh tawn ngai lem lo na chu kan inkawm ve fo thin, a chang phei chuan ka haw tlai thin hle. Ka ṭhianpa chuan eng nge i SA kha han sawi teh a tih rual a ka thin phu rawn rang leh ka bing mup mai chu ka ngaihtuahna kha a chawl nghal vek. Ka sawi duh lo min zawt tawh suh ka ti a engmah kan sawi zawm leh chuang lo. Kan inchhungkhur boruak chu nuam lo ti viau mah ila ka tel lo a an awm hi chuan ka ngaih hi a tha leh ngai chuang miah lo, rilru hmanhmawh tak chung chuan kan ti ti kan ti ti a chaw te kan ei a zan dar 9 a lo ri der mai. Ka bulah chuan zep engmah hi a nei si lova hmeichhia a mutpui tawh zat te leh sex chungchang hi min hrilh reng zel mahse ka lakah chuan mawi loh khawpin a la che ngai lova ka duh lo a nih tih a hre chiang a hmeichhe dang ang a min melh vaih a nih chuan ka kawm tawh lo ang che ka ti fo.Ka ring tawk a thian ang a kan inkawm theih avangin ka nel em em ni berin ka hria. Mipat hmeichhiatna lam hawi phei chuan a awm ngai lo. Zan dar 10 velah chuan min thlah haw turin kan chhuak a kan inchhung boruak tur chu hre lawk leh vek tho mah ila haw ve ziah a ngai fo si a. In kan thleng a rawn lut lo mai rawh ka ti a kan in mangtha a.
In ah chuan ka lut a tumah an lo awm lo. A thim vek a ri ring tak in ka bulah chuan a rawn ri a ka beng ka hup a a ring tial tial emaw tih tur hian ka bengah a rawn khawk vak a, a van hreawm tak. Thawm mak deuh deuh hi ka hria a insual buai thawm hi a ni berin ka hria, ka hlau lutuk engmah ka ti thei lo ka che sawn thei lova ka taksa a khur a ka tap vak vak a, ka pa ka u room atang a rawn chhuak hi ka hmu a eng nge a ka tia ka au ka tap vak vak a, hlau tak chung chuan ka u room ka va en a hrui ka hmuh rual a ka u lo inkhai chu ka hmu a engmah ka hre zui ta lo. Ka harh chhuak a mangchhia ka mang leh a ni tih ka inhria, a ngai te bawkin ka thinphu a nasa em em a, ka tha a khur a sana ka en a zing dar 3 bawr vel bawk a lo ni. Khawvar hun chu ka nghak leh ta tawp mai a.Zingkhua a lo var a ka thawpui ka u em em bulah hian ka va hrilh a damdawi te kha i la nei em doctor hmuh leh tha ka ti e min lo ti a. Ni e,hrehawm tawpah chuan doctor Duhawmi bawk chu ka pan leh ta a. Ka awm dan ka sawi theih ang ang chu ka hrilh a.
Doctor : I tawngtai ngai em ?
me : Aw, a hma chuan tawngtai nasa lutuk mahse tunah chuan har ka ti
Doctor : I piangthar tawh em?
Me : Ka hre lo
Doctor : Pathian hnenah engkim thlen la Pathian nen chuan engkim hneh theih a nia,damdawi hi ka chawh leh che ang a, SOS hi chu i buai thut changin i ei leh dawn nia. Thla khat hnuah i lo kal leh dawn nia.
Ka hun kal tawh tlem tlem a hriat sa avang chuan eng vak mah min zawt lutuk lo in ka hria a, zawhna ka chhanna te pawh "Ka hre lo" tih bak a ni ngai lo.
Ka duh ang puihna ka hmu lo nge lungkim lo tak chuan ka haw a.Tun hma pawhin ka kal fo thin a mahse kan chhungkaw dinhmun in a zir loh vang nge ka dam thei miah bawk si lo.Ka ruak hle mai engmah ka ngaihtuah thei lova, thil rit tak hian min delh hian ka hria.Ka tum ve thin a ka theih tawp pawh ka chhuah ve thin mahse a tawpah chuan hrehawmna in ka tawp leh thin tho si. Engtikni ah nge a tawp ve ang tiin mahni leh mahni zawhna ka in zawt a. Khawiah emaw hmun hla takah kal bo ila ka hun kal tawh thil thleng avang a hlauhna (Trauma) hian min umzui reng tawh lo ang.Tuma min hriat lohnaah awm ila tah chuan ka hahdam ve mahna. Mahse tunah rih chuan engmah ka ngaihtuah thei lo, thim thuk tak ah ka tang a chhuahna leh thawkna tur pawh awm tawh lohna hmunah chuan ka tang a ni.Zan a thim tawh a kawngah chuan ka kal. Tu nge ka nih,hetah hian eng nge ka tih khawnge ka kal ang, ka thil hlimpui thin tam takin min ti hlim tawh lova, engmahin min ti lawm tawh lova, engmah hian awmzia a nei thei tawh lo. Ruah a rawn sur a kalsawn ngaihna ka hre lo min ti lungngai pha lo ka lungngai lo nge ka a vek. Thawk leh khatah chuan nguina hian min rawn tuam a ka hma hun ka ngaihtuah a ngai a ni. Hetia ka awm reng chuan ka hna a nghawng ka hlau a ni.
Ni, kar, thla te chu an liam ve zel a engmah danglam a awm chuang lo. Rei lo te chhung chuan hlim ve thin mah ila a hrehawm ber chu thian tha te bulah pawh kan awm dan hriatthiam theih si loh sawifiah thiam bawk si loh lai hi a ni.
Mi : I va lungngaih hmel ve
Keimah : Ka lungngai lo, chu ai chuan a dang deuh
Mi : Engtia rei nge ni tawh
Keimah : Ka chiang lo
Mi : Engtikah nge a reh i rin ?
Keimah : Awlsam tak a reh mai thei ni se ka ti mahse tunah rih chuan engtikah mah.
Mi : Ti nge tiang hian i awm ?
Keimah : Ka hre lo, ka hre lo lai tak hi a hrehawm lai ber chu
Mi : Mahse hetiang hi i ni reng ngai si lova
Keimah : A duh hunah a rawn awm a a duh hunah min kalsan a ka inringlawk hman lo.
Mi : Ka pui thei che em ?
Keimah : Ka tan awm reng la, kal bo suh.
Chawlhni tuk a ni a chhungkuain chaw kan kil ho ve a hmeh tui ve deuh chang hi chuan kham khawp ei hi a har thin khawp mai. Ka pa chuan kan thlengah sa hrang khat diat diat hi min suah a, a uikawm ve thin hle. Ka u chu a phun deuh neuh neuh a tumah inbe lem chuang lo chuan ngawi reng in chaw kan ei,Sunday sikul ah zirtirtu rawngbawl hna min pek ve avang chuan hmanhmawh takin ka insiam a tunlai thawmhnaw mawi leh changkang inbel tur pawh ka nei chuang lo, incheina ka uar lo hi ka vanneihpui a mahse a chang chuan mawi ka in ti lo ve thin tho. Chanvo te chu tha takin kan hlen thei a ni mahna mahse keimahni mihringah engtin nge a thawh a kan hlawkpuiin kan nun a khawih phak em tih hi ka inzawt fo thin.Hringnun a zawhna ka neih ngai loh hrang hrang te chu ngaihtuah ka ching a Pathian rorel dan te chu ka duh khawp lova fair lo ka ti hle bawk.Pathian tan ka inpekna leh ka theihtawp chhuah ve thinna te ka ngaihtuah a, ka tawngtaina te leh rawngbawl hna ka thawh ve te chuan rah tha an chhuah ve ngai si lo.Vuina hlirin ka khat a Pathian lakah ka ti tau in ka lung a awi thei lo a ni ber.Chutiang rilru pu chung a a rawngbawl hna thawh chu tui tak a thawh a har in ka thinlung pawh a sak hle. Beiseina a san poh leh beidawnna a thuk bik thin.
Khawvel awm tan tirh dan pawh kan hre lova
A tawp hun tur pawh kan hre hek lo
A laihawl velah kan tal mai mai a ni.
Keimah hi ka dik lo nge pawh ka hre bik tawh lo. Nun tho a ngai si, dam chhung tawi te a hlim loh reng ai chuan han nung ve phawt ila nung tawp ila hringnun hi hmangchhawn ve tawp ila kan tih theih bak hi chu a theih loh a ni mai. Nitin chuan hna kal turin ka chhuak a ka hringnun chu ka sawi ang zawng khi a ni mai a bak teh vak a awm lo. Ka hun awl neih changin lehkhabu ka chhiar a khawhar min hnem ber hian ka hria. Hringnun a zawhna tam tak lehkhabuah chhanna ka zawng a. Mihring nun ka zir a mi chanchin ka chhiar a khawvel an hmachhawn dan te an khawvel thlir dan te leh thenkhat chu mahni nunna la ta te leh beidawnna avanga thi ta te an awm bawk. Mi ropui tak tak te chanchin tam tak ka chhiarin ka zir a, ka hun tawnin a zir em vawng zawk nge Existentialist lam hawi hlir ringawt pawh chu ka tui chilh chho a, ka rinna a ngheh loh lai ber a hmelhriat chho ka nih avang pawh khan rinna lamah ka chak lo in ka nunah Pathian a tel kher ngaih lohna te a lian a.Apologetics lam hawi kan chhiar chho leh a youtube ah te ka ngaithla a mahse chuti chung pawh chuan ka thinlung chuan awn lam a nei daih tawh si. Ka ko a tla te ka chung a thil lo thleng leh ka hmachhawn thil te chu pawm dan ka zir chho zel a, chu chuan ka nun dan pawh nasa takin a thlak a ka khawvel thlir dan te pawh a lo dang chho a awmze nei takin ka nung chho ve leh a. "There is no future or past only present" tih thu hmang hian ka inhnem a. Bible pawhin "Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni" a ti a. Ka pawm tawk hle.
Arkaiden zan a ni a, ral lehlamah chuan tleirawl rual zai ri te chu ka hre pha a K.Hminga hla ka duh em em "Zan zairi" tih chu thiam tak hian an sa rat rat a ;
Zan thim thiang dai zan zai ri,
Van hulhliap hnuai hramtin ri;
Zan zaipawl ang an zai a,
Zan hla mawi an rem hian,
Lairil lunglen pindanah hian,
Lunglenin min tham a,
Zan thim thiang dai zan zai ria'n,
Lungrun, ka ngai thin che.
Khua a tlai a, van a ngui a,
Kawl a thim a, ni a liam a,
Zan a lo thlen a, van a thian hian,
Lungrun, nang ka ngai thin che.
Lunglen chhan tur nei lo mah ila K.Hminga hla hi chuan ka lung min len tlat zel. Boruak chu a nuam em em a thla a eng in arsi te chu an lang tuar a Chhohreivung leh Dingdi puantah te,Hrangchhuana leh Chawngmawii te,Siruk leh Zangkhua te chu an lang chiang hle, thli in min rawn chhem heuh heuh a a hahdam thlak lutuk. Ka poet duh em em Ashish Bagrecha poem ka chhiar a chu zan boruak nen zet chuan a va in hmeh tak.
The first time
i fell in love with the moon was from my mom's lap,
outside a broken window inside a broken family at an age
i barely remember.
the first time i believed in hope was when my mom whispered with tears in her eyes,
the moonlight protects you.
Ka phone a rawn ri a Malsawma........ka phone ka en vang vang a ka la dawn nge dawn lo ah ka buai, mahse zanin chu mood a fuh deuh a tiin ka chhang a. Ani hi chu ka thian tha ve tak mai hi a ni, mood off ber lai sawi tur ka hriat miah loh pawhin minute tam tak min be thei kha a nia sawi tur hi a hre reng thin a phone call a ka biak zin ve ber a ni.Rei deuh kan in bia a rilru hrehawm deuh a ka lo awm a hlauh avangin min rawn bia a nih tih ka hria, keipawh kan inbiak tawh hi chuan ka tawng hnem ve thin hle.Darkar 2 dawn kan inbiak hnuin kan inhmangtha ta a. La mu mai lo chuan ka phone te chu ka hmet kual a biak tur lah ka nei chuang lo, nei lo ti ila mi hi ka be peih lo a ni ber ang chu.Pasal nei rual chu ni ve tawh mah ila ka mizia hian min be ve thin tute hi a lo hnar leh thin. Biak te hi han nei ve mah ila a ti zuzi tu chu keimah bawk a ni leh tho. Ka duh ang hmangaihna leh ngaihsakna ka dawn tawk loh vang te a ni berin ka inhria. Chhungkuaah hmangaihna leh ngaihsakna ka dawn tawk loh vang nge ka hringnunah hian hmangaihtu leh ngaihsaktu zawk ka ni bik reng a min hmangaihtu leh ngaihsak hmasa zawk tu ka zawngin ka thlahlel ni berin ka hria. Mut tum a ka inbuatsaih lai mekin msg ka dawng Lalhriatzuala...........Ani hi chu zan mu hma ngai reng reng lo rilru lam harsatna nei ve tho hi a ni a. Tun hmain damdawi an lo ti nasa tawha a, tun hnuah ti tawh lo mahse nghawng a la nei reng a, fel reng lah a harsa si. Zan rei tak tak kan ti ti thin a kan mutthilh theih loh chang phei hi chuan kan in be tlaivar deuh thaw thin. Mi biak hnem lutuk te phone khawih nasat lutuk te hian min ti stress zual thin a,hemi vang hian hman deuh ka nih loh chuan mi ka be vak ngai lo. Pathianin mihringte hi in tanpui tawn turin min siam a, ka hun kal tawh leh ka hun tawn ngaihtuah hian midangte tanpui ve thei tur chuan keimah ka in tih dam phawt a ngai tih ka hria. Mahni lam kan dam phawt loh chuan midangte tan biak ninawm tak te pawh kan lo ni ve thin. Mahni in tihdam hmasak a ngai.
Chu thawmah chuan ka harh chiang hle mai. Inhau ri a ni, bang chu a ri dur dur a, lo kal teh ka that dawn che eheee i duh leh min that la i sawi ngun bawk a ka ti let duh lo che a, ka cho khawp mai che tih leh rik a rual a ka hlau kher mai.Nasa takin ka thin a phu a, thil thalo thleng tur ang mai hian ka ngai, hlauhna in ka khat a, ka mangchhia a nih ka ring a mahse a ni ta hauh lo, thawm a reh tak si lo ah chuan ka tho chhuak nghal a ka u leh ka pa rui an lo insual buai zing dar 7 bawr vel a ni a, an thi phung a, hmeichhe awmchhun ka nih avang chuan hlauh pawh sawi theih a ni lo, an inkarah chuan ka ding a mipa tha chak tak mai chu hmeichhe awmnem in ka thelh a ngai thin a, thlamuang tak hian ka van mu ngai lo tak em. Rei vak lo ah chuan ka thelh dai thei ta a, inchung leh hnuai thenawmte chu nei ve tho mah ila keini chhungkua chu ngaiah min neih tawh avangin kan thawm hria pawh tumah an rawn kal ngai lo.Tumah an rawn leng lut ngai lova in dam tha maw ti a rawn dak pawh an awm ngai lo. Inchhung boruak a that deuh chang hi chuan inbe vak thin lo mah ila reilo te chhung nawmna pawh kha ka thlahlel thin.
Mut kham vak loin tukthuan pawh ei lo in hna ka kal a ,ka thleng chiah tih hian director in min ko a ka va lut nghal a. " Vawiin chu meeting na ah min zui rawh aw dar 11 ah i lo in ring dawn nia" min ti a ka huphurh hle. Ka awm than lohna hmunah chuan ka zam tlat a, company hrang hrang director te an lo kal khawm ang a, thenkhat sap tawng a lo biak te a ngai dawn a, ka phuphurh ngang mai.Kal hma atang ka zam lawk, mi biak te kha a ngai dawn si a tiin kan kal hma kha chu thlamuang leh hahdam takin ka awm lo a ni ber. Ka thin hi a phu dut dut a chetchhiat leh chet nawi ka hlau hle bawk. Kan kal a ka pu file pawimawh leh a presentation pek tur te chu ka lo ruahman sak a,miin min bia ang a tih mawlh ka hlau, tawng vak ngai lo se meeting zawh ah haw nghal daih ila tih ringawt te chu ka ngaihtuah a.Zing lam kan inchhung boruak avang khan ka thin phu a la pangngai thei lo bawk nen, mipui kar a awm kha ka chakna hian a tlin dawn lo dawn dawn a, tlai lam dar 3 velah meeting an zo ve thei hram a, office a let tawh lovin ka haw nghal min phal sak avang chuan ka haw nghal a. Motor a min thlah phei a tum tho na chu ke a ka kal duh zawk thu leh thil tih kawi tur ka nei a tiin chhuanlam ka siam a,kein ka haw phei a. Dan pangngai ang tho in ka earphone ka la chhuak a hla ka ngaithla phei a muangchangin ka kal a. Alan Jackson hla ' The Older I Get' tih ngaithla pah chuan thil hrang hrang ka ngaihtuah a, kum naupangte a ka thawhrim zia leh ka chhelna te, mittui tam tak karah tun dinhmun ka thleng thei te ka nunah mihrang hrang ka lo tawng ve tawh a tih sual tam tak te pawh ka nei, midang tan ka inpek ve thinna te midang tan theih tawp ka chhuah ve thinna te Pathian malsawmna tam tak ka dawn te ka chhiar a, thian tam tak nei lo mah ila ka thian neih chhun te ka tan an hlut zia leh ka tan ui an neih loh zia te ka ngaihtuah a vanneih ka in ti hle.
The older I get, the fewer friends I have
But you don't need a lot when the ones that you got have always got your back
And the older I get, the better I am
At knowing when to give and when to just not give a damn.
Ka thinphu rang lutuk pawh a zia ve tan a, kan veng lam a ka thianten min rawn call a naupan tet atang a ka kawm tawh te an ni a, inhmu reng lo mah ila eng emaw hi chu kan ti khawm ve zeuh thin.Tlai ah i hna banah dine out mai mai ila kan tia i hman ang em an rawn ti a.Ka thian tha tak te hi chu ka hnial em em ngai lova hman e khawi hmunah nge niang kan inhmu dawn nia ka ti a. Haw remchan pahna Wasabi restaurant a khan ti leh mai ila kan tia chu mi lam chu ka pah thla pah a. Dar 5 rik tep velah chuan ka thleng a ka thiante Duhawmi leh Muantei leh Tei te pawh chu an lo thleng ve deuh nghal mai a,ei tur te kan chah a. Muantei chuan hrilh tur che u ka ngah tawh lutuk a ti a kepawh chuan keipawh sawi tur ka ngah lutuk phone ah engmah ka rawn sawi peih si lova ka ti a. Muantei chuan an pa nen an inkar that vak loh thu leh an fanu a ngaihtuah thu te nupa kar lova an awm mai tur leh an fanu pawhin trauma an neih nasat thu te chu a sawi mawlh mawlh a.Chhungkaw kehchhia hi a van pawi tak puitling tihsual naupangin an tuar thin si a ka ti a. Kan thiam ang ang te chuan kan han inhnem tawn a. Kan harsatna te leh sawi tur kan neih ang ang te chu kan sawi a kan inbun ruak hlawm a. Tei chuan eng nge i sawi tur i la sawi ve lo a nia min ti a. Ka tah ka hlauh avangin ka sawi duh lawk lo a sawi tur a min tih tak ah chuan ka sawi ta a. Tunlai chu ka no lutuk a mahni inkhawngaihna ka ngah lutuk a ka pa leh ka u an fel lova inah ka awm chak lo sia, len lah ka chak lo bawk tho nen hmanzan in buai vek zan khan ka inkhawngaih lutuk a ti pah chuan ka mittui a sur zung zung a ,kal na mai tur ka hre si lova inhnuaiah chhuk ka tum a tumah an lo awm si lo, kawm chhak a Maliani te inah chhoh ka tum a a lo awm bawk si lo nangni in awm lo vek bawk si a, kawngah ka tei ka tei a ka inkhawngaih lutuk ka ti a ,a bak engmah ka sawi thei tawh lo. Thinlung tak a min ngaithlatu te bulah chuan mittui hi a sur zung zung zel. Rei tak kan ti ti a kan awm deuh reng a dar 8 dawnah chuan kan ei zo ve ta a, kein kan veng lam chu kan pan thla a ke bawkin kan in thlah diat diat bawk a,rei lo te chhung pawh ni se thiante bul a awm te hi ka thlahlel ngawih ngawih zel.
Khawvelah hian kan duhthusam ang zawng zawng hian kan awm thei dawn lo tih ka hre chiang. Kan duhthu a piang ni lo mah ila khawvelah kan awm miau tawh si a, khawvel chu kan hmachhawn a ngai ve a ni. Kan chawrchhuahna tur chhungkua te hi thlang thei lo mah ila kan duhthlanna hian kan khawvel kan thlak danglam thei a ni.
Nun chu pian leh thih inkar a ni
A karah duhthlanna a awm a
Duhthlanna chuan rah chhuah a nei thin
Midang thil tih avangin a tuartu kan ni thei a
Kan thil tih avangin midangin an tuar thei bawk
Mihring nun chu kan thil tih rah ang zel a lo thang chhoin
Pathian hi dik tak a rorel tur a kan beisei a nih chuan
Kan thil tih rah seng turah hian a in rawlh ka ring lo
A dik lutuk vang zawk hian em ni dik tawk lo a kan ngaih thin.
Nge ni a Pathian hian a siam mihringte chungah hian a inrawlh buai lo zawk ?????
Comments