Ka pa ṭhianpa a ni a, kan hriat theih chin aṭang tawhin tunthleng hian an la inkawm reng. Kan vengchhungah chuan ka pa nen hian hre lo mang an awm ka ring lo. Khawtlang leh kohhranah chuan mi ṭha leh ṭangkai tak an ni lo a zu an duhin rui nawih chang pawh an ngah ve hle. Zu rui ṭhin tih chu kan vengin an hriat dan tam ber a nih dun ka ring. Khawtlang leh thenawm chhungkaw tan pawh ninawm châng lah an ngah , ral khat atanga lo thlirtu tan chuan misual tak pawh an ni ang mahse kei chuan an ṭhian dun inhmangaihna hian hun rei tak a ta tawh ka thinlung a khawih tawh a ni.
Zu in mi an nih avang ngawt hian an sual lova lo biak that duh loh ngawt tur pawh a ni lo. Kan naupanlai deuh kha chuan ka pa rui hi kan nin ṭhin em avangin kan inah lo lêng ṭhin lo se kan ti fo a. A rawn lên luh tawh chuan kan hnawt haw ziah ṭhin. Kan be ṭha duh lova ka pa zu in ṭhin chhanah kan ngai tlat zel. Kawm tawh lo tur te in kan ti a a hmel kan hmuh tawh hi chuan ka pa zu in puiah a sàwm leh ang tih kan hläu hliah hliah ṭhin. Hun a kal zel a zu nghei chang pawh nei ve ṭhin fo mahse a ngai te bawk hian an lo rui thlep leh ṭhin. Kan lo puitlin deuh hnu chuan nikhat chu ka pa in ti hian mi hrilh a, " I pa Muanpuia hi huat ringawt loh tur a sual lova mihring chu eng mi pawh ni ila inzah tawn tur mihring vek kan ni. I pa Muanpuia a nia a duat em em che u a, zu in mi pawh ni rawh se i pa Muanpuia a ni," tiin min zilhhau a. Kha mi ni aṭanga tunthleng hian ka mihring ngaihhlut leh a lo len chang pawh a biak chhiat kan neih ngai tawh pawh hian ka hre lo. Au Awmawmi tih hlir hian min ko ṭhin a kan in a lo lêng lut ber leh mamawh in nei em harsatna in nei em in neih chuan sawi ru aw i pa Muanpuia ka awm hi tih hian a sawi fo ṭhin. A hunlai kha chuan ngaithla liam puat ṭhin mah ila tun hnu hian a hlut ziah ka hre telh telh. Vairam a ka awm hnu pawh a min rawn be ziah tu leh harsatna ka neih leh neih loh te min zawt tu awm chhun a ni ve tlat.
Ka pa nen an in ṭhian thatna kawngah hian zir tur ka ngah em em a. Midang tan chuan ho ang in lang mah se ka ngaihlu tlat. Ka pa a kulcho lai te hian a rawn lang a a chang chuan zu an inpek leh mai te hi kan hläu a eng nge i duh ka va lei ang ORS ka va lei ang aw a tia, dawrah te hian a va kal a a ei duh zawng te hi a rawn lei sak a a siam sak bawk a. Kan in hi a rawn lên tamna ve ber a nih avang hian kan hre chiang hle. Ka pa tan khan ui a nei ngai miah lova an induhsak em em a,zu ah pawh ni se an indun lai pawhin tumah an duham bîk ngai lo. Inchhungah in suh u kan tih pawh hian min zah der a bathroom ah te an in ve mai a. Zai bengchheng chang lah an ngah. An awm dun tawh phei hi chuan an zai ngei ngei a an hlim dun ṭhin sia an nun kha a awhawm ṭhin tawp. Hnawk kan ti ngai lova haw tawh tur a kan tih chuan ṭha deuhin va haw tawh la naktukah i lo lêng leh dâwn nia hi kan ti mai ṭhin a.
Tlai khat chu fei hi a rawn keng lut a, khawi a mi tur nge ka tia i pa ta tur ka siam sak a hi a tia, mistiri a ni bawk a a kut hnu a mawiin ka pa hi a duhsak em em a ni tawp mai. Tlai khat pawh sairawkherh mawi deuh mai hi a rawn hum lut a ka pa tan a siam bawk hi a lo nia. Ka pain thil a tih sak ai chuan ka pa thil a tih sak hi a tam zawk ang. A chanchin sawi tur leh nuihzatthlak lai tam tak pawh a awm. Kan unau hi chuan sawi tur kan hre teuh kan ngaina tlâng tih chu a chiang. Vawikhat pawh home a a awm laiin ka pain ei tur te kengin a va tlawh a, a hnu lawk ah ka pa nen chuan home ah an awm dun leh a 😂 amah kha a lo awm rei deuh tawh avangin a rawn chhuak hmasa a ka pa hian lehkha a rawn ziak ngei a kan inah a rawn deliver thlap a ipa in lehkha a rawn thawn che a tia. Chanchin hlim awm deuh deuh lah an ngah. Vairam ka awm hnu pawhin ka pa nen chite huanah chawhmeh la turin an kal dun a, mi chemte an hawh a pa Mpa'n a lo ti bo bawk an hahthlak ṭhin a nia. An kal dun a an haw dun tawh bawk si lo. Ka pa hian min rawn phone a i pa Mpa nen huanah kan kal a chawhmeh a khai haw vek sia a awmna ka hre bawk si lo a tia a tlai viau tawh a ni, chutia kan in video call mêk lai chuan a rawn lut hlawl a a chawhmeh khai haw te chu a kim vekin a rawn thlen pui leh hlawl a an nuihzatthlak thei a nia aw.
Ka mitthla ah hian a cham reng a. Ka pa hi mi fate hian hetiang hian an ngaihluin an ui ve ngawih ngawih ang em tih hi ka ngaihtuah. Ka bengah hian au Awmawm i ṭha em i dam em mamawh te i nei em i pa chu rawn ngaihtuah suh i pa Mpa ka awm hi a tih ri a cham reng a. Ka pa pawh hian a tuar thiam lo viau in ka hria. Ka pa ṭhiante tam tak mual an liam tawh a pa Mpa hi chuan thinlung a khawih bik ngawih ngawih. Ka pa khawhar hnemtu ber a ni a a khawharna ti zualtu ah a chang mai hi, thihna hi kan dan zawh rual a ni si lo. Au Awmawm zu te hi in in rui ṭhin mah ila kan rilru a chhe bik lo a nia kan sual bik lo, ti hian kan in mai a tu pawi mah kan va sawi lo a tih te kha ka thinlungah hian a cham reng. May thlà te khan ka pa inkhawm turin a rawn sàwm hlawl mai a Sunday dress nen hmuh te khan kan lo fiam zuk zuk a sual hle mah ila biakin kawng chu hriat tur te kha min tia. Kan tan a hlut zia hi kan hre telh telh dâwn a nih hi.
Ka pa te zu in mi an ni a, zu in mi ka hmuh dan te chhungril ah an lo sual bîk loh zia te nghei an duhna kawng a hrehawm tam tak an paltlang te ka lo hria in ka lo hmù ve tawh a. Ṭawngṭai lah an bâng lo. Kohhran leh khawtlang hian ruihhlo hi an do viau a ṭha mahse ṭhenkhat hian a mihring a te hi hnawk an ti in sual bik viau ah te hian an ngai a. Eng nge maw kan nih le. Pathianin a anpuiin a duh takin min siam a Pathian ah chuan ang khat vek kan ni. Mihring te hian kohhran leh khawtlang a kan nihna ah te kan hna chelh a zirte in mihring nihna hi kan lo thliar hrang ve leh ṭhin a chutiang a ti tur chuan eng nge maw kan nih le. Pathian in a duhtak a a siam vek kan ni si.
K Hminga'n thiam tak a a phuah
Keini kan sual rim a nam a,
Zep tur a awm lo,
Kan thil tihin a zir miau a,
Mahse, thenkhat erawh chu,
An sual rim a nam lo,
Khawi nge maw pawi zawk le? a tih kha ngaihtuah zui tham viau a ni. Mihring nihna tak tak chu THINLUNGAH hian a awm si. Tumah hian kan hma hun second 1 pawh kan hre lova vawiin ah eng nge thleng dâwn tih pawh kan hre lo mahni mihring pui te lak a ṭhat chhuah hi kan ti mâkmawh tur a lo ni.
I ruang dai chu hmù ve in
Pangpar mawi tak kengin
Thlah liam ve thei che ila
Ka pa mittui far te chuan
Thinlung a far keh a
Ka pa dinhmunah ka ding a
Nâ ka tiin pawm thiam a har ka ti.
Ṭhian ṭha ber chân chu pawm thiam a va har dâwn em...
Thlamuang takin chawl ang che. 💐
Comments