Nun hi kan awmna hmun a zirin kan thil thlir dan leh kan nihna te hi danglam thei tak a ni a. Naupanlai a kan inbailemchhuan pui te kha kan ṭhiante an ni reng thei tawh lova, kan awmna hmun a zirin kan ṭhian kawm te pawh an lo danglam ve zel a chung te nen chuan phone number te in pe tawnin kan in ral khat kawm chang a tam tawh zawk. Hun a lo kal zel a technology pawhin hmasawn zelin social media atang eng nge kan tih eng nge kan tui zawng eng nge kan vei khawiah nge kan awm tih te thlengin kan nitin nun dan leh hun hman dan te kan inhre pawh tawn vek thei tawh a ni.
Ka contact list ah hian mi 2000 vel an awm a, a tam zawk hi chu ka hre kher lo maithei. Sikul leh kan veng a ka ṭhiante ka chhungte leh hmelhriat hnai vai te,pawl eng eng emaw a ka inhman pui te leh ka hnathawhna hmun a ka ṭhiante an ni. Khawvel technology ṭhang chho zel chuan hmun hrang hrang a mihring te min pawt khawm in, inhmu kher lo pawhin ṭhian ṭha tak tak ah kan insiam a harsatna ah pawh kan in ṭanpui tawn fo ṭhin.
Social media kaltlangin nitin a kan hun hman dan te kan inhriat sak ṭhin a, chanchin inzawh a inbiak em em pawh a ṭul ta vak lo. Ka contact list ah hian mi chi hrang hrang mize in ang lo tak tak te leh thiam thil hrang hrang nei te, zirna lam a sang tak leh zirna lam a thleng sang vak lo hlawhtling tak te pawh an awm. Doctor leh Engineer, mistiri leh sumdawng, officer leh hna sang tak tak chelh te, mahni tuina lam a eizawng te, nitin ei chawp zawng thlengin an awm nawk. Chung ho zingah chuan ka khawvel thlirna tarmit hru fiahin van sang tak aṭanga mihring te khawsak dan leh an thil tih te chu ngawi reng a lo thlir ṭhin ang mai hian ka in ngai. Rilru khawih tak tak te leh thil ṭangkai lo tak tak te pawh a in pawlh nawk mai. Chutiang nuaih a nihna khawvelah chuan nun dan thiam a har ṭhin hle. Mi lungngai tak te leh mi hlim thei tak te ka hmù a, lungkham nei miah lova thawveng ve em em te vei ngah em em te leh mi chanchin a chhe lai ringawt sawi te, mi chhiatna lai ringawt châng te midang tan a Pathian thu post leh lo ṭawngṭai pawl te pawh an bâng lo, an vai chuan an nunah an buai hlawm em em a chung ho zingah chuan ngawi reng a mi nun dan leh hun hman dan lo thlir kual ringawt te pawh an bâng chuang lo.
Pawn chhuak ngai lo room a inkhung nitin zankhua ṭhin tan pawh engkim kan hmùin ka hre vek thei tawh. Heng kan thil hmuh leh hriat te hian a ṭha lo lam a min hruai kawi theihna hi a tam zawk avangin kan thlit fim thiam te pawh hi a ṭul hle mai.
Ṭhalai te hi nakin a ram hruaitu tur ram ti hmasawn tu tur kan la nih avang hian changkanna hian min chim pil ang tih a hlauhawm ṭhin khawp mai. Kan dinhmun a der thawng hle in ka hria. A zawng zawng chuan a ni lo tam tak zawkah hi chuan social media a kan inpho lan dan leh kan thil post duh danah hian kan mizia a lang tlangpui ṭhin. Fiamthu a an sawi, " A IG profile an en a restaurant changkhang deuh emaw an ti," an tih tur ang kha ka contact list ah pawh hian an awm nual in ka hria. 😬(i lo inngaihbel chuan i ni ve tihna). Social media a pho lan tur atan nilengin shooting nei tur ten kan chhuak peih a, kan rilru khawih tu thil tak tak te hi kan tiin kan ngaihtuah thiam pawh hian ka ring tawh lo mi hmuh a pho lan atan a kan tih hi a tam zawk tawh. Kan nun lem lutuk leh mi hmuh tur a kan lan dan kan thil tih miin lo hmù se tih boruak velah kan buai lutuk te hi, kan khawsak säng lutuk te hian dinhmun hniam ah min hnuk thla thei. Thil ṭul lo hmuh hnem lutuk leh hriat hnem lutuk te hian rualawhna thangah min awk a kan nih tur ang min nih tir thei lo ṭhin.
(DUH DUH DAN A AWM CHU DUH LOH DAN A AWMNA)
Chutih rualin, ka contact list ah ṭhalai taima tak tak mahni intodelh leh ka ngaihsan tak tak te pawh an awm.Zirna lam a mi thiam leh thil hre tak tak te lehkhabu ngaina leh inchhiar zau tak te thurawn ka lak ṭhinna leh ka hriatthiam loh thil tam tak ka zawh buai ṭhin te pawh an awm. Mi fing tak tak te leh in la fing tak tak te, thil hre tak tak te leh in la hre tak te pawh an awm, an ni ho zingah chuan thinlung tak a pawh leh thil tak tak ka sawi pui ngam leh ka ngaihdan leh thil thlir dan ka hrilh theih a rilru zau tak a ka thusawi min ngaithlak sak ṭhin te pawh ka thinlung hian a hre reng ṭhin. Thu leh hla lam a tui tak te rimawi leh zai lam tui em em te pawh an awm a nun an ti nuam ve veng veng a hmuh an nuam em em mai zel. Ram leh hnam vei em em te ram hmasawn nan a theih tawp chhuah tu te, politics atang kohhran thlengin ka bial a zauin kan chikim hle.
Mahni dinhmun leh nihna hriatchian a ṭul a, kan social status ringawt kan buaipui chhung hian mi tam takin hma min lo sawn san tawh ṭhin. Mahni inhriatchian a kan contact list te pawh kan thlit fim thiam a pawimawh. Kan tan a ṭangkai lo tur chu hre lo ngamin hnawl ngam ila an thil post en pah a ei lo ni awm tak a sawi zui te hi chin miah loh tur. I ei loh zawng tak mihring a lo nih pawhin kan pawi an sawi loh chuan enliam mai ila, kan thil hmuh leh hriat te hian kan mental thleng a a khawih buai theih avang hian hmasawnna min pe thei thil ah kan mit kan len a kan beng kan chhit a hun tawh.
Hun hian min nghak si lova mi tam tak hmasawn zawng a ke an pen lai hian mi hmuh a kan lan dan ah buaiin mahni pawh in theihnghilh ṭhak khawp in nun kan lo hmang ṭhin em????
Comments