Syria ram hi tun hma atang tawhin mimal rorelna duh loh avangin buaina a tam hle tawh a. Kum 1971 ah khan Hafez Al Assad chu President ni a, kum 2000 ah boralin a fapa Bashar Al Assad in a rawn thlak a ni. Amah duh lo tuten tharum hmangin paih thlak an tum a, ISIS leh Alqaida ten kua an lo hreuh ve char char bawk nen civil war rapthlak zet mai a chhuak ta a nih kha. Mitam tak mahni sahimna zawngin an raltlan a Alan Kurdi te chhungkua pawh Canada a an chhungte bel turin Mediterranean tuipuiah lawngin an inkar phei ve a vaukam lehlam thleng hman lovin Alan kurdi leh a unaupa leh a nu chu he tuipuiah hian chesualin an boral ta a ni. An pa ber erawh a damchhuak hlauh a, mi tam takin nunna an lo chan ve tawh bawk.
Khaled Hosseini hi Afghan-American novelist a ni a. Lehkhabu ṭha tak tak lo ziak tawhin a lehkhabu pakhat The Kite runner tih phei chuan thinlung a khawihin khawvel a deng chhuak a, hemi chauh loh pawh A thousand splendid suns leh The Mountain Echoed tih pawh 55 million lai hralh a ni. Raltlan te tan mi thawhhlawk tak a ni a UNHCR leh UN Refugee Agency tan a thawh mai bakah Afghanistan mipui te tan The Khaled Hosseini Foundation a din bawk a ni.
Sea prayer :
Mediterranean tuipui mi tam tak an boralna kawngah chuan an sahimna tur lam panin lawngah an chuangkai ve a, Alan kurdi pawh anu malchungah bawkin tui takin a muhil a, apa chuan lainat leh hmangaih tak a en chungin a naupanlai nen a khawvel in an loh zia te chu a hrilh a. "Ka fapa nangmah ang rual lek ka nih kha chuan ka u nen Homs ah i pu thlâm chungah infiamin hun hlimawm tak kan hmang dun ṭhin a. Zing hma takah ni chhuah hun nghak in thil siam ropui tak te chu kan thlir vel a, olive thing mawi tak lo ding te chuan min ti hahdam em em thin. I pi kel bê ri te chu a mawi em em a, chaw chhumna bel ri chek chek te leh boruak daifim te chuan hahdamna min thlen ṭhin. I nausenlai khan i nu nen bawng kan en pui ṭhin che a, hnah lo hring dulh ṭhin te kha hmuh a nuamin a hahdamthlak ngawih ngawih a ni. Lo upa deuh tawh ni la chu heng i naupanlai hlimthla nuam tak te hi i hriatrengnaah te an awm ve tur. Heng hi maw i hriatreng ve tur te chu indonna leh thihna, ṭahna leh riltamna, hrehawmna leh lungngaihna chauh hi". A fapa chu a en ngawih ngawih a Homs a a naupanlai a hun hlimawm a tawn zawng zawngte kha a fapa hian tawng ve se a duh em em a. Homs chu a ralmuangin sumdawng tam tak an phe suau suau ṭhin a, Mosolman biakin te Christian inkhawmna te dawr chi hrang hrang te leh ei tur rimtui tak te chuan chu hmun chu a tuam a, a ralmuan a a nawm zia te a hrilh a mahse khang hun zawng zawng te kha mumang ang mai an ni si.
Chu zan chu a vawt em em mai a, naupang an ṭap a, nu an mangang a. Apa chuan "Alan, he zan vawt leh thla êng hnuaiah hian i nu kan kiangah a awm a nia" tiin a fapa chu hnem a. Chu lawng a chuang Afghans leh Somalis leh Iraqis leh Eritreans leh syrians te chuan ni chhuah hun tur an nghakhlel em em tawh a an vai chuan himna tur hmun zawng a kal vek an ni.
"Mi ramah chuan sawm loh leh lawm luh loh kan ni a kan kalna apiangah kan vanduaina hi kan keng tel thin a ni" a pa chuan zawi sap hian a rawn ti a.
A fapa chu a en vang vang a ka kutah hian chelh la engmah thil hlauhawm a thleng lovang a ti a. A dinhmunah erawh a tan engmah a tih theih loh zia a hria, kawng bumboh zia te, tui thuk zia te chu a ngaihtuah a, a chhungkua a venhim theih nan TAWNGṬAINA chauh lo chu tih theih a nei lo a ni.
Zan thim takah thlipui a tleh laiin thla barin ka awm a, khawpui ri dur dur te chuan lung a muan lo kher mai.
Tuifawn nasa takin min nûai a Lalpa duhtak ka au a che.
Marwan ka fapa, he lawngah hian thil hlu ber i ni a, ka ṭawngṭaina hi tuipui hian a ngaithla a sin
Pathian i ring ang.
Lawngah chuan a chuang thei aia tam daih an chuan avangin an lawng chu a chesual ta a tam tak an thi a damchhuak erawh tlem te chauh an ni.
Mihring hian ama nunna thuah hian a thu lo khawp mai. Thih hun thlang thei kan ni lova, engtikah nge kan thih dâwn kan hre lo. Khawvel a kan lawmna te chuan rei a daih lova Pathian a lawmna erawh chuan chatuan a daih si.
Lal ram zau tak neih ka duh lo
Midang rûn a beih pawh ka duh hek lo,
Mi zawng zawng hi ṭanpui theih ka duh,
Juda, midum leh mingo te pawh
Tupawhin midang ṭanpui kan duh chu chu mihring nihna a ni,
Tupawhin midang hlimna thlen kan duh hrehawmna ni lo in.
Midang huat kan duh lo,
He khawvelah hian tu te tan pawh hian hmun a awm
Khawvel hi a hausa a mi zawng zawng tan hmun a awm,
Nun chu a zelenin a mawi tur a ni
Mahse a kawng kan bo si,
Duhamnain mihring thinlung a hneh a
Huatnain kawng kan dâl a,
Hmasawnna lamah kan chak a
Keimahni kan in khar khip leh si,
Kan thiam leh hriatna te chu
a ṭhalo zawng a chher hriamin,
fing vervekna leh nunrawnna in a tuam a,
Tam tak kan ngaihtuah a
Kan thinlungin tlem te chiah a hria,
Ralthuam ai ngilneihna kan mamawh
Suahsualna aiin zahawmna
Heng tel lo chuan mihring nun hi ralthuam ang mai a ni ang a
Engkim kan chân ang..
- Charlie Chaplin
Comments