RAMTHAR TO TREASURY

Zing ni chhuak eng mawi tak chuan ka room tukverh chu a rawn chhun a,sana en pahin minute 10 vel chu ka la mu thei tih leh mut ka rual a ka chhing leh hman tawk tih ah ka pa in tho rawh i tlai ang tih pahin ka hmai a rawn phih a ka harh chiang ngei mai.Inbual turin ka inbuatsaih nghal a hun a lo kal chak duh kher mai tukthuan ei a lo hun leh a hmanhmawh baklekin ka in siam a tlai hlau reng rengin hun a hmang nitin a ni ber.Dar 9 minute 10 in a la ri lo tih ah hna kal turin ka chhuak a khawlum vanglai tak a nih avangin ni a sa kher mai. Sihpui kawnah taxi ka chang a hna kal tur te sikul kal tur te leh mahni tul buaipui a chhuakte chu kan in sul pel nuai a, kawng a kal leh motor tlan vel bak en tur hmuhnawm a awm lo.Tlem a la nau zual deuh te chu an nu leh pa te in sikul tlai hlau ni awm tak hian thenkhat chu an kai dawr dawr a thenkhat erawh motor-in an hruai bawk a chutih lai mek bawk chuan naupang kum 4 bawr vel hi two wheeler taxi hian a sikul kal tur a lo thlah ve bawk a rilru a lo kal thui hman kher mai. Naupang ngaina leh khawngaihna ngah tak ka nih avang hian thil hote a lang pawh hian min ti lungngaiin min ti tap hma em em a, kha naupang kha nu leh pa chhungte chu a nei ve ngei awm si a, nu te la ngen rual leh hruai rual lek a la nih lai a two wheeler taxi in a amah te chauh a an sikul Primary School a a thlah chho chuan mihring dinhmun in an loh zia min ngaihtuah tir a. Thenkhat nu leh pa thla zar hnuaiah duat tak leh an duh zawng engkim an ngen apiang an tih sak a enkawl seilen an nihna khawvelah hian thenkhat tan chuan sweet pakhat lek pawh an tan rualawhna tham a ni a, nu leh pa thla zarna hnuaiah pawh hmangaihna dawng lovin pi leh pu chhungte karah nitin hunbi chu an chhiar ve a naupang rilru thianghlim pawisawi si lo te hian hnuk an va ti ulh thin tak. Taxi pawh kan full der mai bazar lam pan chuan kan chuang chho a veng khat vek kan nih thin avang chuan hmelhriatte nen kan chuang chho leh nawk thin. Hmelhriat hi hmuh ka duh lo fo thin a ka nu leh pa rualte phei chu ka hel hram hram thin. Zawhna atthlak tak tak leh chhan hrehawm tak te hi min zawt leh nawlh thin a nuam ka ti lo a ni. A theih hram hi chuan pawn chhuah loh duh fo ṭhin kha ka ni a.Ka naupanlai atang a ka zawhna chhan peih loh leh nin em em mai chu khawnge I nu ? I pa in zu a la in em ? Mi thenkhat midang rilru tur dawn lova an rilru ngaihtuahna a awm an sawi leh mai thin hi tha ka ti lo a ni. Mi chhungkaw chanchin te hi ti nge an lo hriat chak em em mai le,a tha lam a nih loh phei chuan zawh chin hi thil mawi lo tak a ni. Naupang phei chu a ṭha lam a nih loh chuan an tan a chhan hrehawm tur zawhna zawh loh hi a ṭha a engkim hrethiam rual an nih tawh bakah mi zingah mahni inkiltawihna thleng a thlen ve thei a ni. Mi nunah hian buai lo i la eng ang harsatna nge an lo hmachhawn a an lo tawh tih i hriatpui a i thlamuan dawn a nih si loh chuan ngawih mai hi a fin thlak. Bazar kan thleng leh der mai Treasury thleng turin bus ah ka chuan phei leh a ngai a bus stand lam pan chuan ke in thui vak lo ka chho leh a bazar lamah hi chuan bus a tam deuh avangin chan rei a ngai thin lova bus ah kan lut nghal mai thin. Bus erawh a tawt thin hle mai thutna ka chan loh chang a tam a khawlum lai phei chuan a hrehawm thin hle a ni.Thutna ka chan ve chang hi chuan midang ken hi ka tum em em hran lo a tawt in ka hah thin em em a ka tlawmngai peih lo fo.Tar leh upa chak lo zawk erawh ken chang pawh ka ngah. Mipa kutah ka dah deuh mai thin. Hehe. Treasury thlen nan hun a duh rei lo kher mai minute 5 vel lek ah kan thleng phei a ka thaw huai tawh thin. 

Office lam pan chuan kawng ka kan a putar pakhat a hming chu pu Hrangkunga a ni ( ka pu ka ti mai thin a,lockdown lai khan a lehkhabu ka zawrh sak thin a chuta ṭang a inkawmngeih em em chu kan ni. )Lehkhabu zuar hi a lo thu thin a kuhva leh ei tur hrang hrang hi nitinin min lo ken a lak loh inthlahrunawm khawp hian min duhsak a ni. Kum eng emaw zat chu lehkhabu zuarin ei a lo zawng ve tawh a an chhungkaw chanchin te hmanlai rambuai chanchin jail an tan chanchinte min hrilh a ngaihnawm ka ti ṭhin hle. Mite nunah hian eng ang mi pawh lo ni se zir tur pakhat tal hi a lo awm ṭhin.Kawng sir lungrem a thu ve mai a nih avangin ruahsur khawchhiat hi chuan an in pho thei lova, a bulah ka pa Vala thawmhnaw zuar a ṭhu ve bawk a, a piahah tarmit zuar a hming tak kha ka lo hre mai tawh lo a ṭhu ve bawk a. Treasury petrol pump a in kal emaw District Court a in kal chuan kawng peng tê ah khan phei ula an lo ṭhu tlar mai ang hmuh loh theih loh. An nunah khan zir tur tam tak ka hmù. Ruahsur chang te hian ka rilru ah an lo lang leh ṭhin nitin a sur sa hnuai a ei zawng ṭhin te hian ka rilru an khawih hle. Vawiin chu ruah sur se tiin duhthu te hi ka sam ngam tawh lo ruahsur avang a ei zawng thei lo ka hmuh ṭhin avang, hringnun hi fair lo tih bik chang riau ka nei thin bawk. VANDUAI bîk riau a inhriat chang te hian keini aia vanduai leh zual te hi ka hmù leh a mahse vanduai bik ni a kan ngaih te hian nun hlimna thuruk an lo nei daih ṭhin zawk zu niaaaaa. 

Engtik ni ah emaw chuan nitin a ka kalna kawng ka hnathawh mêk a hi chawlh san hun ka la nei ve ang a chumi hunah chuan he ka pu leh a ṭhiante min duhsak em em ṭhin tu leh ka thawhpui fel tak tak te nen hian kumkhua a inhmu tawh lo turin kan inthen hun te a la thleng ve ang a, kan dan phak loh kan thuneih phak loh thihna te kan chungah a rawn la thleng ve awm si a. 

In atang office inkar kawngah hian hringnun zirlai hi ka va zir hnem tak em........