Engtia rei nge ni ang Lalpa tiin ka zawt fo thin. Khawi atanga lo in tan nge a nih a engtik atang a lo awm nge tih ka ngaihtuah thiam lo hmachhawn ngaihna ka hre lo a ngai a neih lah ka thei mawlh si lo. Ka puak keh dawn ka tuar thiam mawlh tawh lo hrehawm ka ti in a ngaihna reng ka hre lo. Thup a ngai bawk si ka thunun zo bawk si lo. Stress, anxiety, depression ka hre hrang teh nuai tawh bawk si lo.Lalpa a rei tawh e mai kumkhua a hun hmanpui a tan chuan ka zuam mawlh si lo, min tanpui rawh.
Engtin nge I awm tiin min zawt se sawi ngaihna ka hre bawk si lo, ka awm dan hi nuam ka ti mawlh lo ka awm dan apiang hi ka ning ngut ngut a ni deuh ber mai ka nin piah lamah hian ka taksa ngaihtuahna hi a a hah ngawih ngawih a mutthilh kha ka tan a hahdam ber a ka muhil leh thei thin si lo.
Ka dawhthei lova ka hlim mawlh si lo tumah lahin an hre bawk si lo, hre tur in engmah ka sawiin ka ti lang ngai bawk si lova in hriatthiam tir tum erawh a ni thei mawlh lo. Doctor min hrilh kha ka la hre reng he I natna hi I chhungte I hrilh duh lo a nih chuan nangpawn an hriatthiam che beisei suh min ti a, engtin nge ka hrilh ang a engtin nge ka han sawi tan mawlh ang he natna ka ti dawn nge he ka hringnun ti buai tu hi engtia lo in tan nge tih ka hre bik si lo.
Hmanah chuan thil ngaihtuah ngut ngut ka ching thin a mahse a tha lo tih ka hriat avangin hun kal tawh leh nakin hun lo la thleng tur hi engmah ka ngaihtuah ngut ngut duh tawh lova mahse engmah ka ngaihtuah bawk si lo mahse he natna hi ka nei tho si tih ka ngaihtuah leh ngut ngut a engmah ngaihtuah nei lem chuang lovin ka rilru hi a chau tho si, a ngaihna ka va hre tawh lo em.
Rilru lak pen nan ka theih ang ang chu ka ti ve a hna te ka thawk lui a engmah a that phah lo, lehkhabu te ka chhiar lui a rei lo te chhung chu ka chhiar ve thei mai mahse rei a daih chuang lo.Hla te ka han ngaithla lui thin music ri kha zu han ning leh ngut ngut pek a ka stress level a tih san phah fo. A chang chuan ka pa in tape a hla a ngaihthlak te hi ka lo ning ngut ngut a ka nin thu lah ka sawi ngai lo mahse ka stress level a ti sang tlat zel bawk si. A chhan tuin nge min hrilh thei ang le ? Tu mahin min be lo se ka awm ang ang hian min en se tih hi tun dinhmunah hian ka duh ber a ni, ka tawng chak mawlh lo keimah ngei pawh hi ka awm dan hi ka in kham ve tho, lu a na ut ut a hahdam dan tur ka thiam mawlh lo a ni ber.
He natna lak a tang hian min pui thei tu tur thu ka ngaithlain a lehkhabu pawhin ka va chhiar tam tawh teh lul em, min pui lo a ni lo ka zawm lo lam pawh a ni lo he feelings hi a hrehawm em a ni. Ka lungphu hian hahdam hahdam a ti mawlh mawlh thin a awmzia awm ngai chuang si lo. A tak a tawng ve tu chauhin a hrethiam ang. Ka beidawng a ni lo a eng zawngin thlir ka tum lo lam pawh a ni chuang lo hrilhfiah thiam phak rual loh hian a va hrehawm ngut ngut tak em.
Mi insum thei lo tak chu ni ila ka phone te hi ka vawm chhia ang a, bang te ka hnek chawrh chawrh ang a keimah leh keimah te hi ka in tham nawk nawk ang chutia ka tih chang pawh chu a tam he natna ka hriatthiam loh hian tuanna tur mamawh in ka taksa hi a rawn fan chhuak thin a ni. Ka phuah chawp a nih ring suh dawt pawhin he natna hi invuah ka duh hlawl lo ka sawi uar mai mai ah ngai suh ka sawi ai nasa hi a ni a sin ka sawi chhuak thiam lo zawk a ni. He natna atang hian midang pui tur chuan ka la tlin thlawt lo a ni, a chang chuan boruak a tham ral daih te hi ka duh a chhan awm em em si lo hian ka hrehawm ngut ngut bawk si. Mi thiamte leh zir mite chuan thil ngaihtuah ngut ngut a that loh thu an sawi mahse engmah ka ngaihtuah ngut ngut loh pawhin he natna hi a chhuak tho bawk si. Bengchheng leh thawm ri ka kham ngut ngut ka tha a zawi vek.
Kum eng emaw zat chu he natna nen hian hringnun ka lo hmang ve tawh a ka tha emaw ka in tih laiin that loh hun a lo thleng leh thin.Thil zawng zawng hi ka thuhnuai ah ka dah vek thei lo a ni tih hi ngaihtuah a mahni infuih ka tum lui fo thin. Hrehawm mahse harsa mah se ka tan vanpui hial pawh chim mah se Pathian nen chuan a tawp ah engkim a tha thin, a tha lo a nih chuan a tawp ka la thleng lo a ni ti in ka inhnem chawp leh a, a tawp thlen hma hian ka beidawng leh rum rum thin. He natna hian min chim buai loh lai chuan Pathianah dam rinna nghat tawpin doctor te leh kei ai hre zawk te rawn ngai lovin keimah in ka hmachhawn ve theih mai ka ring thin a mahse ka thei si lo. Doctor ten a damdawi min chawh ang te ka ei ve a kal chhun zawm tur a min tih pawh hian ka kal leh thin ngai lo, ka rilru taksa a dam hi chuan nuam ka ti em em a ka hlim bawk a inentir leh lam reng a lang ngai mawlh tawh lo.
Dik tak chuan he natna nei tur hian ka in ring pha lo a ka awih lo lek lek thin thiante fuihtu leh an rin ber an mangan leh an harsatna an thlenna ber ka ni ve a ka theih tawp chuan ka puiin ka fuih ve fo bawk.Mahse mahni pawh ka in pui thei lo a nih si hi.Hringnunah chuan harsatna hrang hrang kan tawk ve thin a chak loh chang te chu awm ve mahse a eng zawngin ka thlir hram hram a mahni in fuih ru ve tau tau thin ka ni ve bawk. Ka chhelna leh Pathian ka rinna hian tun hun hi min hruai thleng ve ni bawk in ka hria mahse ka hriatthiam loh natna ka chungah a thleng mek bawk si Lalpa min pui rawh tiin ka tawngtai leh tawp thin a reh hun chu awm ve leh mai thin mahse lanchhuah hun a lo awm leh thIn si a. Kan rilru put hmang hian kan nun a hruai kawi nasa thei thin an ti a ka rilru put hmang hi a dik lohna ka hre bawk si lo ka theih ang tawk chuan he natna lak atang hian tal chhuah ka tum a ka rilru la peng tur thil tam tak te pawh ka ti lui ve thin mahse reh aiin zual lam a pan zel emaw tih tur hian a awm leh thin reuh si. Natna chimawm tak chu a va ni teh lul em. Engtikah tak dam ang I maw ?
Puitu zawng in doctor te leh upa zawk te rawn ve dawn ila mahni chanchin sawi ka peih si lo ka hahthlak ve ngawt mai………………………….
A chang chuan thisuk nei ang mai hian hliam hmuh te hi hrehawm ka ti a, ka tha te a khur thin a.
A chang chuan in hau thawm ri te hian min ti mangang a hlauhthawnna nasa tak min siam thin.
A chang chuan buaipui ngai an awm te hian ka hlau thin a an chungah thil tha lo a thlen ka hlau a ka tha a lo khur thin.
A chang chuan vanduaina tawk an sawi te hi ka ngaithla duh lova a chhan chu ka awm a lo nawm loh thin vang a ni.
A chang chuan ka duh dan ni lova thil a lo thlen chang te hian ka buai zo leh vek thin.
Engtik ni ah emaw chuan he natna hian min la kian san ve hi ka ring tlat a ni.
Comments