Nupa inhmangaih tak nui ri leh hlim ri chuan chu in tlawm tak chu a luah lum hneh hle mai.Thlasik a in tan a khua pawh a vawt tawh hle a, he hmunah hian ti nge ka awm ka in hrethiam lo mahse ka awmna hmun chu chep tak ni mahse hmangaihna a pawm ka nih avang khan ka lungawi em em mai. Ka pa chuan ka nu pum chu a kuah vawng vawng a hmangaih takin a fawp a bawihte lo piang vat vat rawh kan hmu chak tawh lutuk che tiin min hrilh a keipawh chuan ka hmuh chak tawh thu hrilhin an hriat theih nan ka nu pum chu ka pet a, ka nu leh pa hlim nui ri kha khawvel eng ka hmuh hma a ri ka hriat ah chuan a mawi ber hial awm e.Ka nu chuan a pum chhung a mi pai chung chuanin hna min thawh pui thin a ka nat hlauin hmangaih takin min enkawl thin.Ka nu leh pa hlimna tawm pui tur chuan khawvel eng hmuh ve ka chak tawh em em a ka ban ka phar a ka ke ka mar a chhuah tumin ka bei a ka nu chuan na tiin damdawiin lam an pan pui ta a.Zan khuain damadawiin khumah chuan kan mu a zing lam dar1 November 26,1996 ah chuan he khawvel eng hi ka lo hmu ve ta a ni.
26 November 1996
Khawvelah chuan ka awm ve ta, uar tak mai hian ka tap ta vak vak mai a mahse ka nu leh pa hmel a hlimna kha hmuin hre reng tawh lo mah ila he ka thinlung hian a hre reng si. Nausen a tah a nu hlim tak a a nuihna ni.
Hringnun
zinkawng
Lei chu ka rap ve ta hringnun zia ka tawn chho a duat leh hmangaih tak a enkawl ka nihna hmunah chuan mize chi hrang hrang karah ka hriat ngai loh zirlai thar tam tak ka zir chho ve zel bawk.Thiante nen pawnto te kha nuam kan ti em em a eng dang kan dawn lo hmalam hun tur ngaihtuah a rilru hah leh chauh a awm hek lo panlai nun kha hringnun vul lai mawi lai ber a ni ka ti.Ka lo tleirawl in puitlin lam kawng ka lo zawh chho ve zel bawk a duhzawng ngainat zawng rilru put hmang engkim a lo danglam zo ta nu leh pa tel lova hringnun zinkawng zawh chho chang a awm chho nawk nawk bawk a. Aw khawvel hi ka beisei ang hu a nuam leh thlakhlehawm a va ni lo teh lul em tih vawng vawng chang lah a tam.Nu pum chhung atang ngawt kha chuan engmah hi a lo fiah tak tak lova hun leh ni te an ral a dinhmun ngai rengah kan ding thei hek lo nunphung a lo danglam a khawsak phung pawh a ngai reng thei hek lo,hringnun khawvel pawh a lo danglam zo ta nausen nu leh pa thlazar hnuai a awm a duhzawng ngen ngawt zawng van a rah ang mai a ni ta.He ka hringnun thawnthu hi a va ngaihnawm lo teh lul em, fahrah a piang lo fahrah nun ka iang a hmabak dawn in laikhum ka zal a naktuk lo awm tur lah nghahhleh loh chang ka va ngah thin tak. He ka hringnun zingkawng hi a nuam mawlh lo hlimni awm thin mahse lungngaihni a tam zawk si.Khawvelah hian ti nge ka lo pian le tahna in bul kan tan a tahna bawkin kan tawp leh dawn ni hian ka suangtuah fo thin. He khawvel eng ka hmuh ve avang a khawvel hi danglam ta nge ni ang khawvel vul lai mawi ber ka hmuh hmaih zawk ? Mi tam takin dam thlakhleh chhan tur tam tak an neih laiin dam thlakhleh loh chhan tur tam tak ka nei bik fo ,”ENG A TI NGE” tih zawhna chhanna awm lo hian min hliam fo thin a ni.
Ni e, min hliam fo thin he ka hringnun thawnthu tuma hriat atan ka duh loh thu in thup tam tak hian min hliam fo, hlim ka duh kawng ka zawng ka dap thiante zingah hlim viau in lang thin mah ila chhungril erawh a hlim si lo. Midang hmaah chak tak leh huaisen tak in ka awm a chhungril nun erawh a no em em si, tuma hmuh lohin ka tap a van ka han thlir leh ngawt thin. Khawvel siamtu arsi leh planet te buai miah lo a rem feltu kan Pathian hian he zinkawng a min ti buaitu thil tam tak te hi min chenfelsak ve theih ka ring fo thin.
Ka nunah hian ka hlimni ber chhui let dawn ni ila ka nausen lai nu leh pa hmngaihna dawng a duat tak a thlamuang tak a ka tah vak vak thin lai hi a ni ngei ang le mahse chu zawng ka la sen em a ka hre pha hauh lo mai.
November 25, 2020
Kum 23 liam ta kha ka chhui kir a a bul atang a tun thleng mai hian thil a danglam nasat zia te ka hmu a hringnun zia ah hian zirlai tam tak ka va zir nasa teh lul em nausen atangin puitlin lam kawng thlengin ka nu leh pa te paltlang tawh zawng zawng ka rawn paltlang chho ve a hei hi ka hrechhuak ta he khawvel a nung tur hian tuarchhel a ngai a ni tih hi. Harsa takin nu in a hrin chhuah kan nih ang hian he khawvel a nung tur hian harsatna tam tak kan paltlang a lo ngai ve a ni tih hi ka hun kal tawh ten min hrilh nawn fo thin. Naupang mai ka ni tawh lo puitlin lam kawng zawh chho mek ka nih ve tawh avangin ka lo dai tawh thil atang ringawt pawhin hringnun zia hi hrethiam tawh tur ka ni tihin mahni ka infuih let ve a lo ngai ta, khawvelah hian engmah kumhlun tur hi a lo awm mawlh lo. Eng nge ka dam chhan eng hi nge ka hlimna eng hi nge ka thlamuanna tih zawhna chhanna zawng hian khawvelah hian ka lo vakvai rei teh lul em. Mihring hi kan piang a kan thi leh thin ang hian nun pawh hi tahna te hi hlimna ten a rawn thlak ve thin a hlimna te pawh hi tahna in a zui chang a awm ve fo bawk. He khawvelah hian innghahna tlak reng hi a lo awm lova he khawvel thilah kan in nghah chuan lungngaihna tahna in kan tawp leh a vuina leh tauhna ten kan nun a chim buai a nun ning reng reng in kan lo awm thin. Hei hi ka hrethiam ta min siamtu chu Pathian a ni a, ama ta chauh ka ni tih hi. Khawvel lam ka thlir chuan lungawilohna leh tahna chauh ka hmu thin a Pathian lam ka thlir erawh chuan engkim mai hi a lo tha vek thin.
Tunah chuan ka hrethiam ve ta Isua kiang a awm a lo nawm zia leh thlamuanthlak zia hi ka nun ka han en let a lungawilohna leh vuina hlirin kan khat thin chumi piah lamah chuan Pathian malsawmna tam tak kan dawn hi a tam zawk si,chhiar dan kan thiam lo a ni lo kan chhiar ngai lo fo zawk a lo ni.
Chauin chaklo thin pawh ni mah ila Pathian hmangaihna ropui tak hian min ti chak thar nawn leh thin.
He khawvel eng ka hmuh atang a ka kum 23 na chu ka lo thlah liam ve ta……………..
Lalpa ka lawm e. Kum 24 chhung min hruaina leh min enkawlna hi thuin puang chhuak thiam lo mahila ka thinlungah hian I ropui em em si. He khawvel eng ka hmuh atang a kum 24 chhung hian thil tam tak danglam awm mahse nang chu i danglam lova I pangngai reng a hmangaiha min enkawl I thulh lo a ni tih ka hriat hian ka lawm em em a ni.Lalpa min hmu a ni ti raw he in tlawm tak hi keimah chauh chuan ka luah lum zo lova nang I awm ve ni tih ka hriat hian ka thla a muang a ni ka lawm e Lalpa. Hringnun zia ka hriatthiam theih nan a ka chung a harsatna lo thleng te kha hrethiam lovin tlan bosan thin ni ila I tello nun ka hrethiam lo tur. Ka hun liam ta te ka chhui kir a hmangaih tlak reng ka awm lo mahse nang chuan hmangaihna ban a min kaih I thulh si lo.Mi ten hei hi hre ve se ka duh fo thin nang chauh hi kan damna kan thlamuanna I ni tih hi, nang chuan kan tawrh zawh loh tur natna engmah min tawrh tir ngai lova kan hma ah kal in kan kawng atan eng I ni reng si. Mal leh khawhar tak niin inngai thin mah ila I thu hian min thlamuan a ka thinlungah hian I cheng reng thin.
Ka lawm e Lalpa ka pianchampha thleng leh thei a damna leh hriselna tha min pek hi.
Comments