Chaw ei tur i sawisel hmain chaw ei tur pawh nei zo ve lo hrereng ang che.
I hna chungchang I sawisel hmain hna thawk thei lova natna khum a mu te hrereng ang che.
I silhfen neih te I sawisel hmain thawmhnaw hak tur pawh nei zo ve lo hrereng ang che.
Malsawm I nih zia hre lova social media ah te sawisel tur I zawn hmain dam tak a I la awm hi lawmthu sawi nachang hre thin ang che.
Lawmna chang hriat hi thil awlsam leh ropui tak kan nunpui atan a thil chin than tha tak a ni. Malsawmna chhiar thiam apiangin an nunah lawmna tur tam tak an hmuin a eng zawngin thil an thlir fo thin. I ngaituahna te chu lawmna in I chhungkhat zel a nih chuan lungngaih thlaphanna in hun an chang ngai lovang. Mi tam tak chuan an nun thil thlengah lawmna tur ai chuan a hrehawmna lai an hmu lian zawk fo thin.Mi hlawhtlingte chanchin ka chhiar pakhat a ka thu duh em em mai chu ‘ Ropuina hi thil hlut thiamna ah a in tan’ tih hi. A hunlai chuan ka lo hrethiam lutuk lova puitlinna lamtluang ka zawh chhohna ah hian a hlutna ka hrethiam chho tan ve ta. Lawmna chang hriat lohna hian hlimna min thlen thei lova lawmna nun neih hi hlimna kawng a pawimawh tak a ni.Lawmna kan tih lan hian thil tha kan ti tihna a ni ringawt lova hun duhawm loh leh harsat ber lai pawhin lawmthu sawina tur pakhat tal min hmuh thiam tir zawk a lo ni. Nitinin midang nun nen in tehkhin reng reng in hun kan hmang thin a an neih loh thil tam tak kan neih te hmu thiam turin kan mit a del leh tlat thin. Mi hlawhtlinna kan hmu a mi te phak lohna leh vanduai bikah kan in ruat a vanneihna tawng baw turin kan dinhmunin a phak lo turah kan ngai fo thin. Lawmna nun nei te erawh chuan sawisel tur aiin lawmna tur an lo zawng zawk fo thin.‘Ka lawm e’ tih hi awlsam takin tawngkam naran a hman theih a ni a amaherawh chu thinlung atang a lawmna chhuak chuan hlimna a thlen thin.
Ka hun tawn pakhat a ka nun khawih em em tu chu tlai khat chu office ban dawn tep ah hian kan pi in file pawimawh tak a rawn zawng a chu mi tlai tak chuan kan thiante thenkhat ban hma minute 5 la awm velah an lo haw hman tawh bawk nen kan pi file zawn lah kan hmu zo der bawk si lo kan va zawng nasa tak em ,kan thiante lo haw hma nen chuan kan pi thinrim chu kan hlau khawp mai ban hnuah darkar khat vel kan la awm a thim lek lekah kan file zawn pawh chu hmu zo lovin kan haw thei ve ta hram a. Kan pi chu a lungawi lo kher dawn a nih hi tiin kan lo sawi sep sep bawk. A tuk a lo ni a office ṭan hma devotion kan neih na ah chuan a ang hrep dawn a nih hi ti a kan thin a lo phut dut dut laiin rin loh takin kan tlin tawk lohna leh kan fel tawk lohna kan tihsualah te thinrim mai lovin kan hnathawhah te a lawm thin zia te a sawi daih a nih chu. Pi chuan “ Office ka bang te hi vawiin kan hnathawh te ka ngaihtuah let thin a zanah mut pah te hian hlimna leh lawmna tur tam tak hi ka hmu thin a ni,’’ a ti. Kan hnathawah te a hlim thinzia te min hrilh daih a ka va ngaisang teh lul em. Mihring hi famkim lo kan ni a tupawhin thil kan tisual thei vek a a huho a hnathawhna ah te hian kan tlin tawk lohna leh fel tawk lohna te in sawi sep sep lovin in pui zawk ang u, midang rawn hreh lo ila tupawh hian kan chanvo chelhna ah hian hna hniam leh lian bik a awm lova kan in mamawh tawn vek a ni tiin mite thatna lai hmu thiam a kan thil tih a lawmna tur pakhat tal hmu thiam turin min fuih fo thin a ni.
Luka 6:4
Mahni mita khanchhuk awm chu hmu si lovin, i unau hnênah, ‘Unau, i mita hmawlh tê tak tê awm kha mi lâk chhuahtîr rawh,’ engtin nge i tih theih le? Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.
Nitinin I nunah lawmna tur pakhat tal I hriat chuan a aia tam pawh I hriat belh zel ang.
Comments