ZANIN CHIAH CHHEL TAKIN

Kan naupanlai ti ve khanglang i la khang hunlai khan vaifilm lehlin kha kan en nasa thei hle a tun thleng pawhin a ni ang.Rel pawh kan hmu hnem thin hle, relah kan la chuang ve ang tih reng kan suangtuah pha lo, rel a lemchan hmuhnawm tak tak te rel chung a insual thlawk fuau fuau kan hmuh thin te kha keini naupang mitah kha chuan a va hmuhnawm thei teh lul em.

Zirna a vangin Mizoram pawn Mumbai leh Delhi ah kal turin kan inbuatsaih ve a, tour guide te pawh kan nei tha in briefing pawh min neih pui tha hle mai. Mumbai thlen nan rel ticket sliper class-ah kan han la ve a, rel a fimkhur a ngaih zia te vai tuai kut dawh an tam zia leh ticket nei lova chuang ve an tam thin em avanga fimkhur leh zual a ngaih zia te mahni seat theuh hauh that tur tih thleng in min hrilh lawk vek a, suangtuahna ramah te chuan rel a chuang tawh ang maiin rel chhung boruak te chu kan thinlungah chuan kan vawng kiau mai.

Ni1.2.2019 zing dar 6 ah Aizawl atang busin Silchar kan pan thla ve ta a Silchar kan thlen hnu chuan vai film a kan lo hmuh thin rel sel takah khan kan chuang ve dawn ta reng mai. Ticket pawh la en thiam mang lo khan ticket chu kan hum far a kan tour guide ten kan thutna tur thleng in min han hrilhfiah ve hlawm a rei vak lo ah chuan kan chuanna tur rel a lo thleng ta, a din rei dawn loh avangin tupawh mai kha an hmanhmawhin kan in pawt sawk sawk hi a ni ber mai, luhna tur ah chuan tawt tak mai hian luhin chuhin kan han in nek a chuta chhap ah kan chuanna tur ni lovah kan lo lut chu ni in kan va mangang tak em, a then an lo tap thul rel chhungah mahni thutna zawng reng rengin an in hnawh tut bawk si kan tan chhuah ngaihna reng a awm hauh lo rel chhungah zirlai thar chu kan zir tan dawn ta ni ber, ka thiannu pakhat nen chuan harsa tak chungin kan chhuak thei hram a kan luhna tur number chu kan va zawng, a tawpah chuan kan hmu ta kan thiante au in kan thutna tur lam chu kan pan a kan thutna turah chuan vai an lo thu khat thup mai ticket kan neih avang chuan kan in la huai ve khawp mai kan han hnawtchhuak vel a thutna kan in chuh thul vai lakah khan kan in la raju ve hlawm khawp mai kan thutna turah kan thu fel thlap hlawm ta, hriat lawk ang ngei chuan mi hrang hrang an rawn lut a kan thutna ah an rawn thu ve palh ang tih hlau reng reng khan kan va uikhawm hlawm tak em. Mizo tlawmngaihna  kha khawnge tih hial theih a ni. A lo har ve em bawk a zan mut hun a lo ni thlamuang tak a mut erawh kan beisei lo vai ticket nei lo hoin min hual thup a kan thil bo hlau re re in mu tha hman lo khawpin zingkhua chu a lo var ve ta mai a.Ni 2.2.2019 zing dar 10:30 chuan Guwahati chu kan thleng ve a.

Mumbai zan dar 6:00 a pan leh nghal tur kan nih avang chuan nilengin station-ah chuan kan awm a station chhung ringawtah pawh nun ti thui tu dawn ti sei an tam hle mai.Vai kutdawh kalkawng a mu ringawt mai te mi chi hrang hrang kha an tam a ni. Nikhat rel a kan lo chuan sil awng ve tawh avang chuan rel chuan leh pawh chu kan huphurh lo tlangin nuam kan ti phian zawk hial a ni.Kan rilruah ticket kan neih phawt chuan hei hi ka ta hei hi ka ram chin i rawn pel tur a ni lo tih thinlung kan pu far hlawmin ka hria. Khua a lo tlai ve zel a  tlai lam dar 6 pawh a ri dawn hnai a rel a chuang tur chuan kan in ring leh far tawh mai, kan hlim tlangin kan phur tlang hle mai dar 6 a ri dawn mahse khawnge kan chuanna tur hi a lo va thleng har ve kan mangang tan a then an chiai khawnge kan tour guide te hmanhmawh takin an rawn kal, station dik lohah kan lo awm a ni tih min hrilh kan  thla a va phang hlawm tak em,taxi hire in kan station dik tak zawk kamakya station chu kan pan phei leh ta hlum hlum a kan chiai hmeichhe hlang 65 rual kan nih avang chuan a then an lo tap thul thla a muang mawlh lo WhatsApp group ah te kan in hnem thul rilru tawngtaina nen zirlai thar chu kan kai leh ta.Kamakya station kan thlen chuan kan chuanna tur rel chu a lo chhuak tawh a kan va khawngaih thlak tak em.

Mahse Pathian hian kan tan a tha lo tur hian rem a ruat ngai lova amah kan rin a amah a kan innghah phawt chuan kawng min khawhhmuh zel dawn a ni tih rinna chuan thlaphan lutuk lakah min thlamuan ve a.Kan tour guide te tan chuan a hrilhhai thlak dawn lutuk min khawngaih a kha kan thil tawn ah khan thiam lohna engmah an nei lo an duh vang a kha tiang thil thleng kha a nih loh zia ka thinlung hian a pawm a, kha zan kha thenkhat tan chuan zirlai har tak tah leh lungngaihna hmun mai an ni lek lek hial a ni.Pathian hian kan tan a tha tur vekin rem a ruat thin kan tluk san a hlau keimahni ah hian thil tum lian tak a neihna kawng hi tuman kan dal zo lo.Kan chunga thil thleng zawng zawng te kha a remruatna vek a lo ni ka ti lo thei lo.

Silchar atang rel kan chuan khan harsatna leh hrehawmna tawn tur lakah min hum a rel ticket kan neih kha kan chapo pui a, tu lakah mah tlawmngaihna hmel a awm lo, i chung a ti tur a i duh chu mi chungah pawh ti ve rawh tih reng kan thinlungah a awm lo ni ten ka inngaihtuah let leh vang vang thin.Pathian chuan kan ramah chauh ni lo ramdang hnamdang karah pawh kan rin Pathian hi mi nung a nih zia lantir a duh ni in ka hria.Chapona tlang a tang a min paih thla in Dt 3.2.2019 chuan waiting list ticket chauh nei chuan a tuk tlai dar 5 chuan relah kan chuang risk ve leh tawp mai, mihring an la tam em em loh vang chuan thutna te chu kan nei ve mai a station kan thlen apiang erawh chuan mihring an lo luh belh zel thlamuang reng reng in kan awm lo seat confirm lo ta chu keini pawh hnawhchhuah dinhmunah kan lo ding ve ta sup sup ta, zan hun a va huphurhawm tak em engtin nge kan awm zel tak ang awmna tur reng kan nei ta lo rel chhungah chuan kan vakvai hi a ni ber mai a then ekin bulah awmhmun an rem a then lah mi seat ah rem leh rem lovin an lo thu,tour guide te tan pawh tih vak theih a awm lo dinhmun in ang vek ah kan awm si a va hrilhhai thlak tak em.Zan hun a lo thleng ta seat nei te chu an mu sap sap hlawm a keini rel chhunga vakvai mek te hi engtin nge kan awm tak ang, kan ramah pawh mitthi lumen in kan thu tlaivar thin a lawm tiin zan khawvawt tak karah chuan kan theih tawp chuan kan in thlamuan ve a. 'ZANIN CHIAH CHHEL TAKIN' tiin zan hun kan hmang mek kalkawngah kan thu tawp mut lah a rem chiah bawk si lo vai seat karah a then an in hnawh a thenin min hau min hnawtchhuak thul chutiang reng reng chuan zan hun hreawm takin kan hmang ani.

Kha mi zan a kan tour guide leader in min thlamuanna thu kha ka theihnghilh thei lo ka thinlung hian avawng reng a zirlai thar chu ka va zir chiang teh reng em.

'A hun tawn a zir zel a insiam rem thei mihring hi mipuitling zia a ni. Personality Development theory in kan zir thin mahse practical a zirna hun kan nei hi khawngaih hle che u mah i la lawmawm erawh ka ti, thil tam tak in zirchhuak ngei ang. Nun hi enge a nih ? A tluang purh reng lo, harsatna hian min hmuak vek mahse Pathian ring tlat chunga chhel tak leh thuawih tak a tâwn ngam tuten an su tlang thin.Kan thupui ber atan 'ZANIN CHIAH CHHEL TAKIN' tiin min fuih a', zan hun chu kan hmang liam ve ta mai.

Zanin chiah chhel takin tih tawngkam chuan ka thinlungah hmun zau tak a luah a nunah harsatnate beidawnnate kan tawk thin zanin chiah chhel takin kan tih ang khan kan tuar hram hram a chhel tak a kan tuar chhuah meuh chuan lawmna leh hlimna in min hmuak a ni tih keimahah hian a fiah em em ani.
 
Kawng awlsam a ni lo,
Buaina leh harsatna te,
Hlauhawm tam tak tawh tur a awm reng;
Mahse, Isuan min hruai,
Eng mahin min tibuai lo'ng,
Kawng bumbohte a tirual zel thin.

He ka zin kawngah hian,
Ka ke pente lo chauvin,
Harsatnain min phuar vel mah se;
Ni lawmawm a thleng dawn,
Ropuina ka khum ni chu,
Chutah hlimin ka chawl hlen tawh ang.

Tiin J.W Peterson khan nun hi a tluan phurh loh zia a lo sawi tawh bawk a ni.

Zingkhua lo var chuanin kan tan malsawmna a rawn herchhuahpui ngei ka beisei ru fan a nileng chuan rel ah kan chuang leh ta a mihring an tlem deuh tawh avang chuan thutna awl a tam tawh avang chuan kan mu hahdam hlawm ta a. Dt 4.2.2019 lai lam dar 5 chuan kan kalna hmun tur Mumbai chu kan thleng ve ta.Pathian zarah lungmuang leh hahdam takin Pathian hnenah lawmthu sawina neiin kan thlenna Redsheild rún belin kan zal thei ta.

Chapona nen a hringnun ka chhiar changin chapo pui tur kei aia nei tam zawk ka hmachhawn leh si a, chapo pui tur ka nei nia ka inngaihna te chu midang hmuhsitna kawng ka in hawn mai chauh a ni tih ka hre chhuak a, chapona te chuan reitheihna kawngah min hruai lut mai zawk a lo ni.

Harsatna tam tak kan tawh te hi Pathianin mi ropui tak kan nih na turin a hmang tangkai a tuarchhel tak mi chak tak mi bik entawntlak tak kan nih theih na tur in  ''ZANIN CHIAH CHHEL TAKIN''